Kazateľ

1 ----
1 (HEM) זבובי מות יבאיש יביע שמן רוקח יקר מחכמה מכבוד סכלות מעט׃

2 ----
2 (HEM) לב חכם לימינו ולב כסיל לשמאלו׃

3 ----
3 (HEM) וגם בדרך כשהסכל הלך לבו חסר ואמר לכל סכל הוא׃

4 ----
4 (HEM) אם רוח המושל תעלה עליך מקומך אל תנח כי מרפא יניח חטאים גדולים׃

5 ----
5 (HEM) יש רעה ראיתי תחת השמש כשגגה שיצא מלפני השליט׃

6 ----
6 (HEM) נתן הסכל במרומים רבים ועשירים בשפל ישבו׃

7 ----
7 (HEM) ראיתי עבדים על סוסים ושרים הלכים כעבדים על הארץ׃

8 ----
8 (HEM) חפר גומץ בו יפול ופרץ גדר ישכנו נחש׃

9 ----
9 (HEM) מסיע אבנים יעצב בהם בוקע עצים יסכן בם׃

10 ----
10 (HEM) אם קהה הברזל והוא לא פנים קלקל וחילים יגבר ויתרון הכשיר חכמה׃

11 ----
11 (HEM) אם ישך הנחש בלוא לחש ואין יתרון לבעל הלשון׃

12 ----
12 (HEM) דברי פי חכם חן ושפתות כסיל תבלענו׃

13 ----
13 (HEM) תחלת דברי פיהו סכלות ואחרית פיהו הוללות רעה׃

14 ----
14 (HEM) והסכל ירבה דברים לא ידע האדם מה שיהיה ואשר יהיה מאחריו מי יגיד לו׃

15 ----
15 (HEM) עמל הכסילים תיגענו אשר לא ידע ללכת אל עיר׃

16 ----
16 (HEM) אי לך ארץ שמלכך נער ושריך בבקר יאכלו׃

17 ----
17 (HEM) אשריך ארץ שמלכך בן חורים ושריך בעת יאכלו בגבורה ולא בשתי׃

18 ----
18 (HEM) בעצלתים ימך המקרה ובשפלות ידים ידלף הבית׃

19 ----
19 (HEM) לשחוק עשים לחם ויין ישמח חיים והכסף יענה את הכל׃

20 ----
20 (HEM) גם במדעך מלך אל תקלל ובחדרי משכבך אל תקלל עשיר כי עוף השמים יוליך את הקול ובעל הכנפים יגיד דבר׃